वीरमा निःशुल्क मिर्गौला प्रत्यारोपण सुरु, ३१ वर्षीया दिदीले दिइन् २७ वर्षीया बहिनीलाई मिर्गौला

सरकारको पूर्वघोषित निर्णय अनुसार वीर अस्पतालले निःशुल्क मिर्गौला प्रत्यारोपण सेवा सुरु गरेको छ। अस्पतालमा मंगलबार २७ वर्षीया युवतीको निःशुल्क प्रत्यारोपण गरिएको हो। अस्पतालका निर्देशक डा. भूपेन्द्र बस्नेतले निःशुल्क प्रत्यारोपण कार्यक्रम अन्तर्गत सिन्धुपाल्चोककी रश्मिला श्रेष्ठको प्रत्यारोपण गरिएको जानकारी दिए। उनका अनुसार दुवै मिर्गौला फेल भएकी श्रेष्ठलाई उनकी ३१ वर्षीया दिदी लक्ष्मी श्रेष्ठले मिर्गौला दिएकी हुन्।

अस्पतालका चिकित्सकहरु डा. अनिल श्रेष्ठ, डा. पारसमणि श्रेष्ठ, डा. शान्ता सापकोटा, डा. रविराम श्रेष्ठ, डा. विन्दु शाह लगायतको टोलीले प्रत्यारोपण गरेको हो। शल्यक्रियामा नर्सहरुको तर्फबाट नर्सिङ इन्चार्ज अञ्जना ज्ञवाली, मुना श्रेष्ठ र निभा देवकोटा पनि सहभागी थिए।

प्रत्यारोपण सफल भएपछि रश्मिलाका श्रीमान् टोकबहादुर पौडेलले सरकार र अस्पताललाई धन्यवाद दिए। ओखलढुंगाका पौडेलले श्रीमतीको उपचारकै क्रममा १४ लाखभन्दा बढी खर्च गरिसकेको बताए। भने, ‘अहिले निःशुल्क मिर्गौला प्रत्यारोपण गर्न पाउँदा खुसी लागेको छ।’

‘अस्पतालमा प्रत्यारोपण गर्दा चार लाखसम्म र औषधिका लागि डेढ लाख गरी साढे पाँच लाखसम्मको सहयोग सरकारले दियो,’ उनले भने, ‘यसले मलाई ठूलो राहत पुगेको छ।’

अस्पतालले ‘मिर्गौला प्रत्यारोपण सम्बन्धी निर्देशिका, २०७४’ अनुसार नै निःशुल्क कार्यक्रम सुरु गरेको निर्देशक बस्नेतले जानकारी दिए। निर्देशिका अनुसार एउटा बिरामीको मिर्गौला प्रत्यारोपण गर्दा स्वास्थ्य मन्त्रालयले अस्पताललाई चार लाख रुपैयाँ र बिरामीलाई डेढ लाख रुपैयाँ दिनेछ। अस्पतालले पाउने चार लाख रुपैयाँमा ल्याब परीक्षण, शल्यक्रिया शुल्क, सर्जिकल उपकरण, उक्त समयमा प्रयोग हुने औषधि र प्रत्यारोपणपछि आइसियूमा राख्दा हुने खर्च समेटिएको छ। यसैगरी, शल्यक्रियाअघिको म्याचिङ शुल्क बापत बढीमा ५० हजार रुपैयाँ र प्रत्यारोपणपछिको एक वर्षसम्मको औषधिका लागि एक लाख रुपैयाँ रकम भने बिरामीले पाउनेछन्।

वीर अस्पतालमा निःशुल्क प्रत्यारोपणका लागि तीन सदस्यीय समिति गठन गरिएको छ। डा. बस्नेतको अध्यक्षतामा निःशुल्क मिर्गौला प्रत्यारोपण सेवा सञ्चाल र व्यवस्थापन समिति वैशाख २४ गते गठन गरिएको हो। समितिमा डा. राजेन्द्रकुमार अग्रवाल र टिका पनेरु सदस्य छन्।

समितिका सदस्य पनेरुका अनुसार निःशुल्क प्रत्यारोपणका लागि अब दुई जना लाइनमा छन्। उनका अनुसार अस्पतालमा हरेक मंगलबार मिर्गौला प्रत्यारोपण हुनेगर्छ। अर्को हप्ता निःशुल्क कार्यक्रम अन्तर्गत काभ्रेका बज्रध्वज लामाको मिर्गौला प्रत्यारोपण हुनेछ। त्यसपछि निःशुल्क कार्यक्रम अन्तर्गत झापाका कमल भारतीको प्रत्यारोपण गर्ने तयारी रहेको पनेरुले जानकारी दिए।

वीर अस्पतालमा निःशुल्क प्रत्यारोपण सेवा सुरु हुनुअघि एक सय २० जनाको मिर्गौला प्रत्यारोपण भइसकेको थियो। मानव अंग प्रत्यारोपण केन्द्रबाट मिर्गौला प्रत्यारोपण सेवा सुरु भएपछि केही समय वीर अस्पतालको प्रत्यारोपण सेवा रोकिएको थियो। तर, अहिले अस्पतालमा नियमित प्रत्यारोपण हुँदै आइरहेको छ।

source : swasthykhabar