आइसीयू र भेन्टिलेटरका लागि अर्थ मन्त्रालयद्वारा १ अर्ब ४१ करोड रुपियाँ छुट्यायाे

आइसीयू र भेन्टिलेटरका लागि अर्थ मन्त्रालयद्वारा १ अर्ब ४१ करोड रुपियाँ छुट्यायाे

  • Post author:
  • Post category:In-Media

काठमाडौं, जेठ १३ गते । कोभिड–१९ का कारण गम्भीर बिरामी परेका बालबालिकाहरुको उपचारका लागि पिडियाट्रिक आइसीयु र आइसीयु भेन्टिलेटरको थप व्यवस्था गर्न अर्थ मन्त्रालयले ४१ वटा अस्पतालका लागि १ अर्ब ४१ करोड रुपैयाँ सुनिश्चित गरेको जनाएको छ ।

जसमा पिडियाट्रिक आइसीयुतर्फ ताप्लेजुङ अस्पताल, संखुवासभा अस्पताल, तेह्रथुम अस्पताल, भोजपुर अस्पताल, खोटाङ अस्पताल, सोलुखुम्बु अस्पताल, ओखलढुङ्गा अस्पताल, रङ्गेली अस्पताल, सुनसरी अस्पताल, सर्लाही अस्पताललाई तीन–तीन करोड रुपैयाँ छुट्याइएको अर्थ मन्त्रालयले जनाएको छ ।

त्यस्तै, बारा अस्पताल, रामेछाप अस्पताल, दोलखा अस्पताल, रत्ननगर अस्पताल, भक्तपुर नगर अस्पताल, रसुवा अस्पताल, पर्वत अस्पताल, स्याङ्जा अस्पताल, म्यादी अस्पताललाई पनि तीन–तीन करोड रुपैयाँ छुट्याइएको छ ।

सोहीअनुसार पाल्पा अस्पताल, रोल्पा अस्पताल, पृथ्बीचन्द्र अस्पताल, मुसीकोट अस्पताल, मुगु अस्पताल र मेहलकुना अस्पताललाई पनि तीन–तीन करोड रुपैयाँको सहमति दिइएको अर्थमन्त्रीका प्रेस सल्लाहकार भुवन केसीले जानकारी दिनुभयो ।

त्यस्तै, सेती प्रादेशिक अस्पताललाई ६ करोड, गजेन्द्रनारायण अस्पताललाई ९ करोड, तुल्सीपुर अस्पताललाई ९ करोड र भक्तपुर अस्पताललाई १२ करोड रुपैयाँ सुनिश्चित गरिएको अर्थ मन्त्रालयले जनाएको छ ।

अर्थ मन्त्रालयकाअनुसार आइसीयु भेन्टिलेटरतर्फ धुलिखेल अस्पताल, पोखरा स्वास्थ्य विज्ञान प्रतिष्ठान, बिपी कोइराला स्वास्थ्य विज्ञान प्रतिष्ठान र लुम्बनी प्रादेशिक अस्पताल तथा भीम अस्पताललाई १ करोड ८० लाख रुपैयाँका दरले सहमति दिइएको छ ।

गजेन्द्रनारायण अस्पताल, भेरी अस्पताल, डडेलधुरा अस्पताल, नारायणी अस्पताल, कोशी अस्पताल, राप्ती स्वास्थ्य विज्ञान प्रतिष्ठान, कर्णाली स्वास्थ्य विज्ञान प्रतिष्ठान, जनकपुर प्रादेशिक अस्पताल र सुर्खेत प्रदेश अस्पताललाई १ करोड २० लाख रुपैयाँका दरले स्रोत सुनिश्चित गरिएको पनि अर्थ मन्त्रालयले जानकारी दिएको छ ।

त्यस्तै, कान्ति बाल अस्पताल, पाटन स्वास्थ्य विज्ञान प्रतिष्ठान र त्रिवि शिक्षण अस्पताललाई तीन तीन करोड रुपैयाँ सुनिश्चित गरिएको छ । अर्थ मन्त्रालयले मेची अस्पताल र धौलागिरी अस्पताललाई ६० लाख रुपैयाँका दरले, सेती प्रादेशिक अस्पताल तथा महाकाली अस्पताल र भरतपुर अस्पताललाई थप २ करोड ४० लाख रुपैयाँका दरले स्रोत सुनिश्चित गरेको जनाएको छ ।

स्वास्थ्य तथा जनसंख्या मन्त्रालयले माग गरेअनुरुप अर्थ मन्त्रालयले कोभिड–१९ को रोकथाम, उपचार तथा नियन्त्रणका लागि बजेट सुनिश्चित गर्दैआएको छ ।

source: gorkhapatraonline